نماز سے آغاز

خدا کا دین ہی انسان کے لئے فطری اور حقیقی دین ہے۔ یہ حقیقت ڈر کے لمحات میں کھل جاتی ہے۔ آدمی خواہ کوئی بھی دین اختیار کرے، خواہ وہ کوئی بھی سہارا پکڑے، مگر جب انسان کی زندگی کا جہاز کسی بھنور میں پھنستا ہے، جب اس پر کوئی نازک لمحہ آ جاتا ہے، اُس وقت اس کو تمام چیزیں بھول جاتی ہیں۔ اُس وقت وہ بے اختیار ہو کر ایک خدا کو پکارنے لگتا ہے۔ یہ تجربہ اس بات کا ثبوت ہے کہ حقیقی دین صرف خدا کا دین ہے۔ یہی دینِ فطرت ہے اور اسی دینِ فطرت کا دوسرا نام اسلام ہے۔