اخلاص

انسان کے معاملہ کو خدا کا معاملہ سمجھنا حضرت ابومسعود بدری کہتے ہیں کہ میں اپنے ایک غلام کو کوڑے سے مار رہا تھا۔ اس اثنا میں میں نے اپنے پیچھے سے ایک آواز سنی۔ ”اے ابومسعود “ مگر غصہ کی وجہ سے میں اس آواز کو پہچان نہ سکا۔ پھر جب آدمی قریب آگیا تو میں نے دیکھا کہ وہ رسول اللہ صلی اللہ علیہ وسلم ہیں۔ آپ فرمارہے تھے ۔ اے ابو مسعود ، جان لو کہ خدا تمہارے اوپر اس سے زیادہ قادر ہے جتنا تم اس غلام کے اوپر قادر ہو۔ (اعلم ابامسعود ان الله أقدر عليك منك على الغلام ) یہ سن کر خوف کی وجہ سے کوڑا میرے ہاتھ سے چھوٹ کر گر گیا۔ میں نے کہا کہ اے خدا کے رسول ، وہ اللہ کی خوشنودی کے لیے آج سے آزاد ہے۔ رسول اللہ صلی اللہ علیہ وسلم نے فرمایا کہ اگر ابو مسعود ایسا نہ کرتے تو آگ ان کو پکڑلیتی۔ (مسلم )