متوازی عمل

بسنے والے ہر انسان کے لیے یہ ممکن ہو جائے گا کہ وہ اپنی جیب سے اسمارٹ فون نکالے اور اس کے ایک سوچ کو ٹچ کرے اور پورے قرآن کا ترجمہ اس کی اپنی قابل فہم زبان میں اس کے سامنے آجائے۔ دعوت کا یہ عالمی ذریعہ آج مغربی سائنس کی بنا پر عملاً ایک واقعہ بن چکا ہے۔ غالباً دورِ آخر کا یہی وہ دعوتی امکان ہے جس کا ذکر بطور پیشین گوئی ایک حدیث رسول : لَا يَبْقَى عَلَى ظَهْرِ الْأَرْضِ بَيْتُ مَدَرٍ وَلَا وَبَرٍ إِلَّا أَدْخَلَهُ اللَّهُ كَلِمَةَ الْإِسْلَامِ بِعِزٍّ عَزِيزٍ أَوْ ذُلٍّ ذَلِيلٍ (مسند احمد، حدیث نمبر 23814) میں کیا گیا ہے۔ یعنی، دنیا کے تمام چھوٹے اور بڑے گھروں میں اللہ تعالیٰ اسلام کا کلمہ (کلمۃ الاسلام (پہنچادے گا، خواہ انسان چاہے یا نہ چاہے۔ اس حدیث میں ’کلمہ اسلام‘ سے مراد قرآن ہے۔ یہ ایک قابلِ غور بات ہے کہ حدیث میں ’إِدْخَالُ الْكَلِمَةِ فِي كُلِّ الْقُلُوبِ‘ (ہر دل میں کلمۂ اسلام کا داخل ہونا) کا لفظ نہیں آیا ہے، بلکہ حدیث میں ’إِدْخَالُ الْكَلِمَةِ فِي كُلِّ الْبُيُوتِ‘ (ہر گھر میں کلمۂ اسلام کا داخل ہونا) کا لفظ آیا ہے۔ اس کا مطلب واضح طور پر یہ ہے کہ ایسا نہیں ہوگا کہ کرۂ ارض پر بسنے والے تمام لوگ اسلام میں داخل ہو جائیں، بلکہ جو واقعہ ہوگا، وہ یہ کہ ہر چھوٹے بڑے گھر میں جہاں کوئی انسان رہتا ہے، وہاں قرآن داخل ہو جائے گا، خواہ انسان چاہے یا نہ چاہے۔ مذکورہ حدیث کے آخر میں عزت اور ذلت کے الفاظ اپنے لفظی معنی میں نہیں ہیں، بلکہ وہ اسی معنی میں ہیں کہ آدمی چاہے یا نہ چاہے، ہر حال میں ایسا ہوگا کہ خدا کا کلام اس کے گھر میں داخل ہو جائے گا— انٹرنیٹ اور اسمارٹ فون کی ایجاد کے بعد یہی واقعہ اپنی کامل صورت میں عملاً ظہور میں آگیا ہے۔