مارکسزم کی نظریاتی ناکامی

سرمایہ داری نظام کے خلاف طبقاتی لڑائی جاری رکھنے کا بہانہ تلاش کیا گیا ہے۔ ایک طرف مارکسزم کا دعویٰ ہے کہ سرمایہ داری نظام تاریخ کے اقتصادی سفر کی ایک مخصوص منزل ہے جس کی ترقی سے محنت اور سرمایہ کا تضاد زیادہ نمایاں ہو جاتا ہے۔ دوسری طرف یہ بھی دعویٰ ہے کہ اسی عمل سے یہ تضاد کم ہو جاتا ہے۔ گویا سورج نکلنے کے بعد کبھی دن آتا ہے اور کبھی سورج نکلتا ہے تو رات کی تاریکی اور بڑھ جاتی ہے۔ مارکسزم کے تضاد کو رفع کرنے کی کوشش میں اس کے اندر مزید تضادوں کا اضافہ کر دینا یہی لینن کا وہ سب سے بڑا فکری کارنامہ ہے جس کو مارکسی تعلیمات سے جوڑنے کے لیے ’’مارکسزم لینن ازم‘‘ کی اصطلاح وضع کی گئی اور کہا گیا کہ ’’لینن ازم مارکسزم سے انحراف نہیں بلکہ اس کی ترقی یافتہ شکل ہے۔‘‘ ایک کمیونسٹ مصنف نے لکھا ہے: ’’لینن ازم کو نہ ماننا خود مارکسزم کا انکار کرنا ہے۔‘‘ روزا لکسمبرگ نے اس قسم کے واقعات کو سامنے رکھ کر کہا ہے کہ: ’’روسی کمیونسٹوں کا دعویٰ ہے کہ انھوں نے سوشلسٹ خیالات کے ذخیرہ میں نئی سچائیوں کا اضافہ کیا ہے مگر یہ سچائیاں دراصل وہ غلطیاں ہیں جو انھیں روس میں حالات کے تحت مجبوراً کرنی پڑی تھیں۔‘‘ لینن کی تاویل کے اس نقص سے اگر قطع نظر کر لیا جائے، جب بھی یہ تاویل اس کے خلاف جاتی ہے۔ یہ دراصل اشتراک کی فلسفہ کی پوری بنیاد کو ڈھا رہی ہے۔ مارکس نے ماضی کے تمام قوانین کو یہ کہہ کر رد کر دیا تھا کہ کوئی قانون ایسا نہیں ہو سکتا جو ہر زمانہ اور ہر قسم کے حالات کے لیے درست ہو۔ اس نے کہا تھا کہ ’’انسانی سوسائٹی میں جب بھی اس قسم کے غیر سائنٹفک نقطہ نظر سے کام لیا جاتا ہے تو ہمیشہ تباہی کا منہ دیکھنا پڑتا ہے۔‘‘۔ کیوں کہ ’’تمام عقیدے ایک خاص زمانہ کی طبقہ واری زندگی کا عکس ہوتے ہیں اور بعد کے حالات میں جب کہ زندگی کی سابق نوعیت بدل چکی ہوتی ہے، وہ عقیدے بھی بیکار ہو جاتے ہیں بلکہ ترقی کے راستے میں حائل ہوتے ہیں۔‘‘ مگر مارکسزم کے متعلق ان کا دعویٰ تھا کہ اس نے انسان کو قوم پرستی اور فرسودہ عقیدوں سے ہمیشہ کے لیے نجات دلا دی ہے۔ اس نے ساری کائنات کا تجزیہ کر کے نہ صرف حال کی مکمل اور صحیح تصویر پیش کی ہے بلکہ مستقبل کی راہِ عمل بھی بتا دی ہے۔ مگر