مطالعہ سیرت

اس موضوع پر ایک مشہور مصنف کی کتاب السیرۃ النبوية کے نام سے چھپی ہے۔ اس کے مقدمہ میں صاحب کتاب لکھتے ہیں کہ ---- مولف کو معلوم تھا کہ سیرت کے موضوع پر لکھنے والوں نے بہت سی اہم کتابیں لکھی ہیں۔ مگر مولف نے اس کو اپنی سعادت سمجھا کہ وہ سیرت کے عظیم موضوع پر ایک نئی کتاب لکھے اور اس طرح وہ سیرت نگاروں کی اس نورانی لڑی میں شامل ہو جائے : وكان يرى السعادة فى تالیف كتاب جديد فى السيرة النبوية لينخرط فى سلك المؤلفين النوراني في هذا الموضوع الحبيب الجليل۔ (صفحه ۱۰) ظاہر ہے کہ یہ مطالعہ کا کوئی علمی طریقہ نہیں۔ اس طرز مطالعہ کا نتیجہ یہ ہوا کہ سیرت کا موضوع مسلمانوں کے درمیان علمی و فکری ارتقاء کا ذریعہ نہ بن سکا۔ وہ صرف عقیدت مندانہ جذبات کی تسکین یا فخر و مباہات کے اظہار کا ذریعہ بن کر رہ گیا۔ موجودہ زمانہ میں سیرت کے موضوع پر جو کتابیں لکھی گئی ہیں وہ زیادہ تر اسی نوعیت کی ہیں۔ وہ مسلمانوں کے لئے کتاب فخر تو ضرور ہیں، مگر وہ حقیقی معنوں میں ان کے لئے کتاب اسوہ یا کتاب رہنمائی نہیں۔ چند مثالیں ہمارے سیرت نگار جب سیرت کے موضوع پر لکھتے ہیں تو وہ اکثر ایسا کرتے ہیں کہ بعثت سے قبل عرب کی حالت کی نہایت تاریک تصویر پیش کرتے ہیں۔ وہ بتاتے ہیں کہ بعثت سے قبل سارا عرب تاریکی میں ڈوبا ہوا تھا۔ اخلاقی اعتبار سے لوگ وحشی بنے ہوئے تھے۔ درجنوں عورتوں سے نکاح کر کے ان کو اپنے گھر میں رکھ لیا کرتے تھے۔ لڑکیوں کے پیدا ہوتے ہی مار ڈالتے تھے۔ وغیرہ وغیرہ۔