مطالعہ سیرت

شاید یہ کہنا غلط نہ ہوگا کہ یہ کتابیں کسی قاری کی اس امید کو پورا نہیں کرتیں جس کو وہ از روئے قرآن ان کتابوں میں پانا چاہتا ہے۔ یہ صحیح ہے کہ سیرت کی ان کتابوں میں عقیدت مندانہ الفاظ کی کثرت ہوتی ہے۔ مثلاً آپ کی پیدائش کا ذکر سادہ الفاظ میں نہ کر کے اس طرح کہنا کہ آفتاب رسالت طلوع ہوا۔ یا آپ کی وفات کو سادہ الفاظ میں نہ لکھ کر اس طرح کہنا کہ آفتاب رسالت غروب ہو گیا۔ مگر اس قسم کے اسلوب کی حیثیت لفظی مدح و منقبت کی ہے نہ کہ ایک حقیقت کے علمی اور تاریخی اظہار کی۔ اور مدحیہ الفاظ کی کوئی بھی مقدار علمی اظہار کا بدل نہیں بن سکتی۔ ضرورت ہے کہ سیرت کے موضوع پر ایسی کتابیں لکھی جائیں جو مذکورہ قرآنی آیتوں سے مطابقت رکھتی ہوں اور حقیقی معنوں میں اس کی تشریح و تفسیر بن سکیں۔ زیر نظر کتاب اسی قسم کی ایک ابتدائی کوشش ہے۔