مارکس کے حل پر اصولی تنقید

مارکس کے حل پر اصولی تنقید اوپر ہم نے مارکس کے فلسفہ کا نظری حیثیت سے جائزہ لیا ہے ۔ مارکس کا یہ فلسفہ محض فلسفہ نہیں تھا بلکہ وہ دراصل زندگی کے مسائل کے ایک مخصوص حل کے لئے تائیدی نظریہ کے طور پر پیش کیا گیا تھا۔ مارکس کے نزدیک زندگی کے تمام مسائل کا حل یہ ہے کہ پیدائش دولت کے ذرائع پر اجتماعی ملکیت قائم کر دی جائے ۔ اسی حل کو برحق ثابت کرنے کے لئے اس نے وہ فلسفہ گڑا تھا جس کا ہم نے اوپر کی سطروں میں جائزہ لیا ہے ۔ اب ہم مارکس کے تجویز کئے ہوئے حل پر گفتگو کریں گے۔ گفتگو دو پہلوؤں کے اعتبار سے ہوگی۔ اولاً ہم علمی اور اصولی حیثیت سے اس حل کا جائزہ لیں گے اس کے بعد یہ بتائیں گے کہ تجربہ میں یہ حل کیسا ثابت ہوا ہے ۔ لینن نے کہا ہے " سوشلزم کے بغیر انسانی سماج کی نجات ناممکن ہے۔ جنگ ، بھوک اور دوسری سیکڑوں آفتیں جن میں بے شمار انسان تباہ ہورہے ہیں ۔ ان سے محض سوشلزم ہی بچا سکتا ہے ۔ مگر حقیقت یہ ہے کہ سوشلزم نے موجودہ خرابیوں کا جو حل تجویز کیا ہے وہ خود ظلم کی ایک بد ترین شکل ہے۔ اس کی مثال بالکل ایسی ہے جیسے کسی کے چہرہ سے مکھی اٹھانے کے لئے آپ اس کے اوپر ایک پتھر کھینچ ماریں ۔ جس کے نتیجہ میں مکھی تو اڑ جائے مگر آدمی کا چہرہ لہو لہان ہو جائے ۔ سیاسی جمہوریت کے بعد معاشی جمہوریت سوشلزم نے زندگی کے مسائل کا جو حل پیش کیا ہے وہ یہ ہے کہ معاشی پیداوار کے ذرائع کو افراد کے قبضہ سے نکال کر پوری سوسائٹی کے قبضہ میں دے دیا جائے ۔ اس کا کہنا ہے کہ زندگی کا سب سے بڑا مسئلہ اس کا معاشی مسئلہ ہے ۔ دوسرے تمام مسائل اسی ایک مسئلہ کی شاخیں ہیں ۔ انگلس کا مشہور قول ہے انسان کو سب سے پہلے کھانے کے لئے خوراک ، پینے کے لئے پانی ، رہنے کے لئے مکان اور تن ڈھانکنے کے لئے کپڑا چاہئے ، اس کے بعد ہی وہ سیاست ، مذہب ، سائنس اور