یہ فرق کیوں

کے اکثر شہروں میں نظر آتا ہے۔ ہر شہر میں مسلمانوں کا حال یہ ہے کہ وہ قدیم شہر میں زیادہ ہیں اور جدید شہر میں کم ۔ یہ گویا ایک علامت ہے کہ مسلمان قدیم دور میں دنیا سے آگے تھے ، مگر جدید دور میں وہ دنیا سے پیچھے ہو گئے ۔

موجودہ حیدر آباد کے تین بڑے حصے ہیں ۔ نیا حیدر آباد ، پرانا حیدر آباد ، سکندر آباد ۔ یہاں جو فرقہ وارانہ فسادات ہوتے ہیں وہ سب پرانے حیدر آباد میں ہوتے ہیں ۔ نئے حیدر آباد یا سکندر آباد میں کوئی فساد نہیں ہوتا ۔ اس کی وجہ یہ ہے کہ نئے حیدر آباد اور سکندر آباد میں زیادہ تر پڑھے لکھے لوگ رہتے ہیں ۔ مگر پرانے حیدر آباد میں معاملہ اس کے برعکس ہے ۔ یہ تجربہ بتاتا ہے کہ " تعلیم " فرقہ وارانہ فساد کے خلاف ایک روک کی حیثیت رکھتی ہے ۔ جو لوگ فی الواقع اس ملک میں فرقہ وارانہ فساد کو ختم کرنا چاہتے ہیں انھیں چاہیے کہ قوم کو تعلیم یافتہ بنانے کی کوشش کریں ۔ جب معاشرہ کے زیادہ لوگ تعلیم یافتہ ہو جائیں گے تو فساد کا سلسلہ اپنے آپ ختم ہو جائے گا ۔ پرانے حیدر آباد کا شاید سب سے بڑا مسئلہ ٹریفک کا ہجوم ہے ۔ تنگ سڑکیں اور زیادہ ٹریفک ، اسی کا دوسرا نام پرانا حیدر آباد ہے ۔ بعض اوقات آدمی محسوس کرتا ہے کہ اگر وہ پیدل چلے تو شاید وہ سواری سے پہلے اپنی منزل پر پہنچ جائے گا ۔ اس سلسلہ میں ایک صاحب نے یہاں کا لطیفہ بیان کیا ۔ ایک شخص پرانے حیدر آباد کے علاقہ سے پیدل گزر رہا تھا ، اتنے میں اس کا کوئی جاننے والا اپنی کار پر ادھر سے گزرا ۔ اس نے اپنی کار روک کر اس آدمی سے کہا کہ گاڑی میں آجائیے ، آگے میں آپ کو آپ کی منزل پر چھوڑ دوں گا ۔ آدمی نے یہ سن کر جواب دیا : آپ کا شکریہ ، مگر مجھے ذرا جلدی ہے ۔

حیدر آباد میں بہت سی تاریخی چیزیں ہیں جن کو دیکھنے کے لیے لوگ کثیر تعداد میں وہاں جاتے ہیں ۔ انھیں میں سے ایک سالار جنگ میوزیم ہے ۔ اس میوزیم میں ۴۰ ہزار سے زیادہ نادر نمونے رکھے ہوئے ہیں ۔ کہا جاتا ہے کہ مشرقی دنیا میں یہ اپنی قسم کا واحد میوزیم ہے ۔ اس کو ریاست کے ایک سابق وزیر اعظم نے بنایا تھا ۔

اس میوزیم میں جو چیزیں رکھی گئی ہیں ان میں سے ایک عجیب چیز ایک سنگ مرمر کا مجسمہ ہے ۔ اس مجسمہ میں ایک عورت کو اس حال میں دکھایا گیا ہے کہ وہ نہا کر غسل خانہ سے نکلی