مطالعة قرآن

مطالعة قرآن

قرآن میں یہود کے بارے میں بتایا گیا ہے کہ پیغمبر اسلام صلی اللہ علیہ وسلم کی بعثت سے پہلے وہ ایک "نجات دہندہ" کے آنے کا انتظار کر رہے تھے۔ وہ کہتے تھے کہ بے آمیز وہ آئے گا تو ہم اس کا ساتھ دے کر مشرکوں سے لڑیں گے اور پھر دوبارہ اپنا غلبہ قائم کریں گے۔ مگر جب محمد بن عبداللہ کی صورت میں وہ آنے والا آيا تو یہود نے آپ کو ماننے سے انکار کر دیا۔ حتی کہ وہ آپ کے سخت ترین دشمن بن گئے (البقره رکوع (11) اس کی کیا وجہ ہے کہ جو لوگ ایک آنے والے" کے منتظر رہتے ہیں، جب وہ آنے والا آتا ہے تو یہی لوگ اس کے سب سے بڑے دشمن بن جاتے ہیں۔ اس کا جواب قرآن کے مذکورہ حصہ کا مطالعہ کرنے سے معلوم کیا جا سکتا ہے۔

اس انکار اور دشمنی کا سبب ہوائے نفس (البقره ، 87) ہے۔ یہ انتظار کرنے والے سمجھتے ہیں کہ آنے والا ان کی ہوائے نفس کے مطابق ہوگا ۔ جب وہ دیکھتے ہیں کہ وہ ان کی ہوائے نفس کی تائید نہیں کر رہا ہے تو پہچان لینے کے باوجود وہ اس کے منکر اور مخالف بن جاتے ہیں ۔ اپنے آپ کو بدلنے کے بجائے وہ خدا کے فیصلے کو بدلنے کی کوشش کرنے لگتے ہیں۔

آنے والا جب حق لے کر آتا ہے، جب کہ وہ ملاوٹ والے حق کو اپنائے ہوئے ہوتے ہیں ۔ آنے والا خدا کی بڑائی کو بیان کرتا ہے، جب کہ وہ اپنے اکابر کی بڑائی کو محبوب بنائے ہوئے ہوتے ہیں ۔ آنے والا اصولی دین کا اعلان کرتا ہے، جب کہ وہ قومی دین کو اپنائے ہوئے ہوتے ہیں ۔ آنے والا آخرت کے مسائل کو سب کچھ بتاتا ہے، جب کہ وہ دنیا کے مسائل کو سب کچھ سمجھے ہوئے ہوتے ہیں ۔ آنے والا زندہ دین کی طرف پکارتا ہے، جب کہ وہ جامد دین کی بنیا د پر گدّیاں سنبھالے ہوئے ہوتے ہیں۔ آنے والا اتباع حق کا داعی ہوتا ہے، جب کہ وہ اتباع ہوئی پر اپنی زندگی کا نقشہ بنائے ہوتے ہیں۔ یہ فرق آنے والے کو ان کی نظر میں سخت مبغوض بنا دیتا ہے ۔ وہ اپنی اصلاح پر آمادہ نہیں ہوتے، کیوں کہ اس میں انھیں اپنی پوری زندگی کا ڈھانچہ بگڑتا ہوا نظر آتا ہے ۔ اس لیے وہ آنے والے کو غلط ثابت کرنے کی جھوٹی مہم شروع کر دیتے ہیں ۔ وہ خود اپنے مطلوب کو نامطلوب بنا دیتے ہیں۔